Во Кисела Вода акција за собирање електричен отпад

Општина Кисела Вода заедно со друштвото за управување со отпад „Нула Отпад” денеска почна голема еколошка акција за собирање електронски и електричен отпад.

Од 10 часот утринава, на повик од општината, жителите на три урбани заедници, 11 Октомври-бараки,  11 Октомври-Згради и Цветан Димов, ги носат старите и неупотребливи мали и големи електрични апарати, компјутери и компјутерска опрема, телевизори, видео рекордери, музички системи, електрични алатки во своите месни заедници, за што добиваат вредносни ваучери.

Е-отпадот ќе биде преземен, соодветно селектиран и рециклиран од страна на „Нула Отпад”. Акцијата ќе се одвива до втората половина на декември, кога ќе се знае и која месна или урбана заедница од општина Кисела Вода собрала најмногу електронски отпад за што ќе добие награда.