Во Милано се слави титула

Интер по 19-ти пат е италијански шампион откако Аталанта не успеа да победи кај Сасуоло (1:1), што предизвика вистинска бура во Милано, каде што навивачите веќе ја прославуваат првата титула од славната 2010 година, кога беа тројни шампиони под водство на Жозе Мурињо и со Горан Пандев во тимот.

 

Илјадници фанови на Интер се собраа на централниот плоштад „Пјаца Дуомо“, и покрај барањата на клубот да се почитуваат ограничувањата за поради КОВИД. Ова е четврта титула од Серија А за тренерот Антонио Конте, по трите титули кои ги освои со Јувентус.

 

„Старата дама“ беше прв клуб од Серија А кој честиташе на ривалите на социјалните мрежи, а првпат по подолго време се јави и претседателот на Јувентус, Андреа Ањели, кој му честиташе на газдата на Интер, Стивен Жанг, и вети дека „ќе се вратат“ следната сезона.