Во Турција издадени налози за апсење за 70 воени офицери

Турски обвинители издадоа налози за апсење на 70 активни воени офицери, осомничени дека се поврзани со исламскиот проповедник Фетулах Ѓулен, кој живее во САД и Анакара го обвинува за организирање на обидот за преврат во јули 2016 година.

Турската полиција во исто време спровела операции во 38 области во рамките на истрагата со која раководат обвинители во турскиот округ Конија.

Операцијата против осомничените е преземена врз основа на искази на војници, кои претходно се уапсени за поврзаност со движењето на Ѓулен.

По обидот за преврат, 50 илјади лица меѓу кои и државни службеници вработени во безбедноста се затворени и чекаат судски процеси, а повеќе од 150 илјади лица беа отпуштени или привремено остранети од работа.