Захарова: Подготвени сме за преговори за Украина, предупреди на провокации во Европа

Портпаролката на руското Министерство за надворешни работи, Марија Захарова, изјави дека Русија е подготвена за „продуктивни преговори“ за Украина, но само доколку тие доведат до конкретни резултати.

„Захарова за агенцијата РИА Новости изјави дека Москва и понатаму е отворена за преговарачкиот процес и контакти, но оти инсистира на „вистински резултати“. Таа додаде дека западните лидери, според руската оценка, се сè повеќе фокусирани на други глобални кризи, вклучувајќи ги и конфликтите на Блискиот Исток.

Захарова повтори дека Русија не се откажала од учество во разговорите за можниот мировен план предложен од САД, но дека и понатаму ја доведува во прашање подготвеноста на Украина за преговори. Како што наведе таа, Москва останува на ставот дека за долгорочно решение е потребно да се отстранат, како што тврди, „причините за конфликтот“, вклучувајќи ги безбедносните прашања и проширувањето на НАТО.

Захарова, исто така, предупреди и на можноста за „провокации“ против руските дипломатски претставништва во Европа околу 9 мај, наведувајќи дека руските служби се подготвени за такви сценарија и оти очекуваат одговорност од државите домаќини во обезбедувањето на сигурноста на дипломатите.

– Секојдневно сме подготвени на провокации, бидејќи тие се случуваат практично секој ден, ваму и таму. Сите сме ги виделе и ментално сме подготвени на нив. Видовме до кој степен овие непријателски режими дегенерираа – рече таа.

Таа додаде дека во текот на претходните години биле забележани поединечни инциденти за време на одбележувањето на Денот на победата во странство, но без поголеми нарушувања.

– Имаше, има и, за жал, ќе има провокации. Дали сме подготвени? Да, апсолутно – заклучи Захарова

МИА