Законите за судовите и за Судскиот совет во среда пред пратениците

Советот за следење на имплементацијата на Стратегијата за реформи на правосудниот сектор, на својата втора седница одржана вчера попладне, ги разгледа предложените законски решенија за судовите и за Судскиот совет, соопшти владината прес-служба. 

Заменик-министерот за правда Оливер Ристевски, појасни дека веќе в среда, по празниците, пратениците во Собранието на Република Македонија ќе расправаат по предложените измени.

Членовите на Советот во дискусиите акцент ставија на предложените законски одредби кои се однесуваат на одговорноста на судиите, како и на предложените членови во Предлог законот кои се однесуваат на нивната заштита, а се со цел да се постигне што поголема независност на судството и враќање на дигнитетот на судиите.

Заложбите на членовите на Советот за реформи се во согласност со извештајот на Прибе, а во кој се сугерира судиите да се оценуваат исклучиво врз основа на донесените пресуди.

Членовите на Советот имаа одредени забелешки и за Предлог-законот за Судски совет на Република Македонија.

На седницата на Советот за следење на имплементацијата на Стратегијата за реформи на правосудниот сектор, присуствуваа и претставници на ОБСЕ кои најавија нивно редовно присуство и поддршка и во наредниот период, информира прес-службата на Владата.