Зголемена потрошувачката на вода во Кочани

Високите температури ја зголемеија потрошувачката на вода од градскиот водоснабдителен систем на Кочани. Од Комуналното јавно претпријатие „Водовод“ истакнуваат дека потрошувачката е зголемена во вечерните часови кога, како што нагласуваат, несовесните граѓани ги полеваат бавчите и градините.

- Засега немаме посериозни проблеми во испораката на вода до   домаќинствата. Бунарскиот систем на КЈП „Водовод“ располага со капацитет од околу 320 литри во секунда и доколку рационално се користи, е доволен за снабдување на сите делови од градот, изјави техничкиот директор Александар Ефтимов.

Просечната потрошувачка на вода е 170 до 180 литри во секунда, а деновиве максималната потрошувачка надминува 250 литри.

Изминатите години, пракса на кочански „Водовод“ беше испраќање екипи на терен кои до сите домаќинства апелираа за порационално користење на водата. Годинава, како што вели Ефтимов, се уште не се јавила потреба од преземање вакви мерки, што укажува на тоа дека свеста кај граѓаните проработила. Кражбите на вода, кои енормно ја зголемуваат потрошувачката, и натаму остануваат проблем со кој се соочува Комуналното јавно претпријатие.