Ангеловски: Да се вратиме во Скопје непоразени

Со многу самодоверба настапија селекторот Игор Ангеловски и репрезентативецот Иван Тричковски на прес конференцијата пред средбата со Албанија во Скадар, вечерва 20.45ч.

Впечаток е дека Македонија е подготвена да ја одигра својата игра против селекцијата на Албанија и затоа нема страв од противникот кој на стадионот „Лоро Боричи“ ќе биде бодрен од 16 илјади грла.

Селекторот Ангеловски дипломатски одговараше на сите новинарски прашања:

„Воспитан сум дека луѓето не треба да ги делам по ниедна основа. Кога се работи за фудбалот постојат само добри и помалку добри фудбалери. На сите оние што се повикани им верувам повеќе од своите очи. Тие се дел од тимот и ние сме среќни што имаме такви фудбалери кај нас. Ова е натпревар како секој натпревар, па подобриот на зелениот терен нека победи“, изјави Ангеловски за кого секој резултат освен пораз ќе биде позитивен.

За играчот од нападот Иван Тричковски, фаворит е селекцијата на Албанија:

„ Сигурно дека ќе биде тежок меч во кој домаќинот е фаворит. Но и ние имаме свои адути и сигурен сум дека секоја шанса што ќе ни се даде за позитивен резултат ќе ја искористиме максимално“- изјави на прес конференцијата Тричковски.