Асад: Сириската криза е конфликт меѓу Западот и Русиja

 Граѓанската војна во Сирија е всушност конфликт меѓу Западот и Русија, изјави сирискиот претседател Башар ал Асад во интервју за рускиот весник „Комсомолскаја правда".

- Актите на Турција во Сирија претставуваат инвазија, што е спротивно на меѓународното право. Евентуалното одземање на градот Алепо од рацете на бунтовниците, ќе и даде можност на сириската армија да ги одврати терористите назад кон Турција, додаде тој.

Според него, треба да продолжи „расчистувањето на таа област“ и бунтовниците да бидат поттиснати кон Турција, „за да се вратат онаму од каде што дошле или да бидат убиени“.

- Нема друг начин. Алепо ќе биде многу важно стратешко место за реализирање на тој потфат, нагласува натаму Асад во интервјуто.

Сирискиот претседател при тоа повторно ги истакна Русија, Иран и либанското шиитско движење Хезболах како главни сојузници на неговата земја во борбата против терористичката групација Исламска држава

- Русија, Иран и Хезболах се наши постојани сојузници и нивното присуство овде е сосема законско. Тие војуваат против терористите, но има други фактори, кои се вмешуваат токму со цел да им помогнат на терористите. Сирија е независна држава, а Западот никогаш нема да се помири со независноста на која и да е земја, без оглед дали тоа е малата Сирија или големата Русија. Што им е проблемот со Русија? Тоа што таа го заштитува своето право да вели „да" или „не". А Западот сака постојано да се согласувате со нив. Ист е проблемот и на Сирија со Западот, дополни сирискиот лидер.

Според него, Саудиска Арабија предлагала помош за Сирија, под услов Дамаск да ги прекине односите со Техеран.

- Моментно, ситуацијата наликува на Студена војна во развој. Западот, особено САД, не ја имаат завршено Студената војна по распадот на Советскиот сојуз, изјави Асад, додавајќи дека САД и дозволиле развој на вахабизмот.