Д-р Петличковски: Колективен имунитет не е возможен

Александар Петличковски во Дневникот на ТВ Сител изјави дека нема место за таков бран како оној ланскиот кога заврши летото.

– Мал дел отпаѓа на имунизираност и прележана болест, но и условите не му одговараат, а може и да има нешто во вирусот што го прави таков – вели Петличковски на прашањето зошто ковид-19 слабее на лето.

Тој вели дека пред една и пол година предвидувањата, односно пресметките биле дека 60 отсто имунизирани преку вакцина или природен пат се потребни за колективен имунитет, но дека сега прагот е кренат до 85 проценти за вирусот да нема каде да се шири.

– Колективен имунитет не е возможен, има појава на нови соеви, а покрај тоа никогаш нема да постигнеме 100 отсто вакцинираност. Дополнително, има луѓе кои не пристапуваат кон втората доза. Затоа, тоа реално нема да се случи – додава тој.

– Ако имаме една возрасна група, вирусот ќе може да проциркулира неколку месеци и повторно ќе се врати кај имунизираните, затоа мислам дека е добро да се затвори и таа врата, со вакцинирање кај помладите. Колку повеќе време вирусот циркулира и опстојува во природата, толку поголеми се шансите да се врати – тврди докторот.