Дела од 23. Кичевска ликовна колонија на изложба во Велес

Во Ликовниот салон во Велес синоќа беше отворена изложба на дела од 23-тата Интернационална Кичевска ликовна колонија. Организатор на изложбата е Народниот музеј од Велес. 

На изложбата се претставени 38 дела кои се дел од 65-те изработени од уметниците-учесници на колонијата од 13 држави (Македонија, Израел, Северен Кипар, Индија, Ирак, Албанија, Бугарија, Србија, Германија,Казахстан, Хрватска, Косово и Турција). 

Делата се во различни техники: акрил на платно, масло на платно, комбинирана техника и четири скулптури од метал и една од дрво.

Изложбата за отворена ја прогласи Горан Доневски од Кичево,  организатор на колонијата, кој пред присутните рече дека во прекрасниот амбиент во Куќата на уметноста во Кнежино, далеку од вревата и тешките македонски горештини, во креативна творечка и релаксирана атмосфера од 2-ри до 16 јули 2016 се одржала 23. Интернационална Кичевска ликовна колонија.

- Имавме можност да видиме различни светови и индивидуални пристапип и утврдување на своите ликовни обрасци. Секој од овие творци, преку изборот на својот личен ликовен говор, се обидуваа да воспостават нова врска меѓу духот и сопственото време, да ни ја откријат вистината и од онаа страна што ни е помалку позната. Тоа беше комуникацијата или нова визуелна размена на мислења, рече  Доневски.

Делата од Колонијата, која е веќе препознатлива и уникатна по своите врвни дела, досега се претставени во Кичево, Скопје, Прилеп и Велес, а ќе бидат претставени и во други градови во земјава.