До 30 септември аплицирање за стипендии за старотурски јазик

Министерството за образование и наука (МОН) ги повикува заинтересираните да го запазат крајниот рок, 30 септември, за аплицирање на конкурсот за доделување 20 целосни стипендии за македонските државјани кои ќе се одлучат  да се запишат на додипломски и постдипломски студии за изучување на старотурски јазик на некој од светските универзитети на кои има катедри за отомански студии во академската 2016/17 година.

- Досега се пристигнати три апликации, но со оглед на тоа што во изминатиов период бројни заинтересирани кандидати комуницираа со МОН, апелирам да внимаваат на крајниот рок, да се пријават и да ја искористат ретката можност што ја нуди државата за бесплатно студирање и гарантирано и брзо вработување на специфично работно место преку кое ќе помогнат во проучувањето на бројни факти за нашата историја. Доволно е да бидат запишани на некој од факултетите каде има студии за изучување на старотурски јазик во академската 2016/17 година, да приложат потврда до МОН и да си обезбедат стипендија, рече заменик министерот за образование и наука Спиро Ристовски на денешната прес-конференција.

Тој посочи дека станува збвор за конкурс кој се објвува веќе трета година, чија цел е да се создаде кадар од исклучителна важност за државата што ќе врши превод, толкување, анализа и обработка на голем број стари документи, ретки ракописи и материјали кои ги има во македонските, но и во странските достапни архиви, како и во библиотеките и имотните книги, а кои се напишани на старотурски јазик.

- Преку досега објавените конкурси доделивме вкупно девет стипендии и тоа четири за додипломски и пет за постдипломски студии на Софискиот и Сараевскиот универзитет. Сите студенти одлично напредуваат, а двајца од нив веќе подготвуваат магистерски тези, што значи во најкусо време очекуваме да магистрираат и веднаш да бидат работно ангажирани во Државниот архив, Институтот за национална историја, МАНУ и слични институции, рече Ристовски и нагласи дека годинава се очекува да има и стипендисти кои ќе учат на Истанбулскиот универзитет.