Додик осомничен за купување на вила на Дедиње во Белград

Претседателот на Република Српска, Милорад Додик на 2 април треба да се појави во Обвинителството на Босна и Херцеговина во својство на осомничен во истрагата за купување на вила на Дедиње во Белград, објавија босанските медиуми.

Додик во март 2022 година беше сослушан џс купување на вилата но, не може да се поведе обвинение против него додека не биде сослушан за сите околности за кои го обвинува Обвинителството на БиХ. Тој е осомничен за кривично дело перење пари, примање подароци и други видови поволности, како и злоупотреба на службената положба.

Претседателот на РС ја купил вилата на Дедиње на 14 мај 2007 година за 750.000 евра. Иако тврдеше дека вилата ја платил со пари од заем во „Павловиќ банка“ од Бијелина, беше утврдено дека кредитот од таа банка подигнал една година подоцна, на 27 јуни 2008 година. Барањето за кредитот го заверил со печат на Владата на РС, со која тогаш раководеше.

До 2018 година вилата била издавана на Амбасадата на Израел.

Вилата била изградена во 2005 година и е проценета на 1.260.000 евра.