Државниот врв со честитка до верниците што денеска го прославуваат Божиќ

Католичките верници денеска го одбележуваат Христовот раѓање-Божиќ. Католиците во Македонија го одбележуваат со миса во црквата „Пресвето срце Исусово“ во Скопје, на која годинава присуствуваше и претседателката на Македонија.

Таа во својата честитка напиша: „Божиќ, како еден од највозвишените христијански празници, нè потсетува на вечните вредности: солидарноста, човечноста и надежта, коишто ги зближуваат луѓето и ја зајакнуваат вербата во подобра иднина“

Честита испрати и спикерот Гаши.

„Божиќните празници носат пораки на мир, солидарност, човечност и меѓусебно почитување, вредности кои се темел на секое демократско и мултиетничко општество. Токму преку заемно разбирање, почитување на различностите и заедничка посветеност кон општото добро, ја градиме стабилноста и иднината на нашата држава“, порача Гаши.

Честита испрати и премиерот Христијан Мицкоски.

„Да подадеме рака кон нашите ближни и нашите сограѓани, без оглед на разликите, на оние на кои им е потребна нашата помош, на најранливите категории и на сите оние кои се соочуваат со предизвици. Божиќ е празникот на дарувањето и споделувањето на меѓусебна љубов и разбирање. Нека Божиќната светлина ги осветли нашите заеднички цели кон подобро утре!

„Божиќ е празник на надежта, љубовта и заедништвото. Овој голем празник нè потсетува дека само со солидарност, меѓусебна почит и грижа едни за други можеме да изградиме поправедно и похумано општество, во кое секој граѓанин ќе има еднакви можности и сигурна иднина“, напиша и лидерот на СДСМ.