Две лица се уапсени во Шангај за време на протестите против строгите анти-ковид мерки

Полицијата денеска уапси две лица во Шангај, каде демонстрантите протестираа викендов поради здравствените мерки за спречување на ширење на коронавирусот.

Еден полицаец изјави дека тие биле приведени затоа што не ги почитувале наредбите на полицијата и ги упати новинарите до локалните полициски власти за повеќе детали.

Полицијата, исто така, им нареди на присутните да се разотидат и да ги избришат фотографиите од нивните телефони.

Демонстрантите се собраа вчера во Шангај за да протестираат против строгата анти-ковид политика што е во сила речиси три години, но и да побараат повеќе политички слободи.

Во Кина расте заморот поради тешката политика за борба против пандемијата. Последните денови во неколку градови веќе се одржаа спорадични, а некаде и насилни протести, особено во најголемата фабрика за iPhone во светот во централна Кина.