Еден загинат и петмина повредени по земјотрес во рудник за јаглен во Полска

Едно лице загина, а пет се повредени утринава во рудник за јаглен во Руда Слонска, јужна Полска, јавија француските медиуми, повикувајќи се на компанијата за ископ на јаглен ПГГ.

- Како резултат на земјотресот што се случи во 6:13 часот по локално време на длабочина од околу еден километар, едно лице загина, а пет други се повредени, без животна опасност, изјави портпаролот на компанијата Томаш Глоговски, кој додаде дека починатиот има 39 години.

Според Глоговски, акцијата за спасување била завршена до 10 часот.

Вкупно седум лица загинаа оваа година во Полска во рударски несреќи, покажуваат официјалните податоци. Бројот на жртвите во рудниците во земјата минатата година беше 30. Ископувањето јаглен и понатаму е особено важно за полската енергија.