Едно лице загина, а десетици се повредени во земјотресот на медитеранскиот брег на Турција

Најмалку едно лице загина во земјотресот со интензитет од 5,8 степени според Рихтеровата скала што го погоди западниот брег на Турција рано утрава, соопшти Европско-медитеранскиот сеизмолошки центар (EMSC).

Епицентарот на земјотресот бил на длабочина од 68 км во морето во близина на крајбрежниот град Мармарис, само неколку километри од грчкиот остров Родос, според EMSC.

Гувернерот на Мармарис, Идрис Акбијик, во објава на X изјави дека 14-годишно девојче било хоспитализирано со напади на паника и починало кратко потоа.

Тој додаде дека 69 лица биле повредени откако скокнале од своите домови за време на земјотресот.

Во самиот Мармарис не се пријавени структурни штети.

„Нашите тимови за проценка на штетите продолжуваат со операциите на терен. Досега не е забележана никаква штета“, изјави министерот за урбанистичко планирање Мурат Курум.

Турската агенција Анадолија пренесува дека многу приморски одморалишта, вклучувајќи ги Мармарис, Фетие и Бодрум, во покраината Мугла, во 2024 година примиле 3,7 милиони странски туристи.