ЕК очекува поголем економски раст од предвиденото во ЕУ

Европската Комисија ги ревидираше своите проекции за економскиот раст на ЕУ и на еврозоната за 2021 и 2022 и предвидува забрзување на активноста благодарение на вакцинацијата, јави дописничката на МИА од Брисел.

Комисијата очекува дека економијата во ЕУ ќе порасне за 4,1 отсто оваа година и 4,4 отсто во 2022 иако закрепнувањето нема да биде еднакво во сите земји членки.

Минатата година европската економија се намали за 6,1 отсто поради пандемијата од Ковид-19 и покрај кусо подобрување во текот на минатото лето.

Забрзувањето на процесот на вакцинација во ЕУ би требало да помогне да се зголеми домашната потрошувачка и инвестициите како и зголемување на побарувачката за извоз од ЕУ, предвидува Комисијата.

Јавните инвестиции би требало да го постигнат своето најголемо ниво во последните десет години.

Ситуацијата ќе остане неповолна за пазарот на трудот предвидува извршната власт на ЕУ со стапка на невработеност од 7,6 отсто оваа година, што е повисока стапка од предкризниот период. Јавниот долг и дефицит исто така ќе постигнат рекордни нивоа во повеќето земји членки и над границата што ја поставуваат европските повелби – 60 отсто од БДП за долгот и три отсто од БДП за дефицитот.