ЕУРО 2016: Пеналите на Португалија и донесоа полуфинале

Репрезентацијата на Португалија е првата која обезбеди пласман во полуфиналето на Европското фудбалско првенство што се одржува во Франција.

 

Португалците место меѓу четирите најдобри изборија со победата над Полска со 5:3 на пенали, во првиот дуел од четвртфиналето одигран синоќа на стадионот „Веледром“ во Марсеј откако по 120 минути беше 1:1.

 

Со голот на Роберт Левандовски по само 100-секунди игра Полска поведе со 1:0, но Ренато Санчез во 33. минута израмни на 1:1, што беше и конечен резултат по регуларните 90, но и дополнителните 30-минути.

 

Во пенал серијата, клучен беше ударот на Блажиковски во четвртата сериија кој португалскиот голман Патрисио го одбрани, за веднаш потоа Кваресма да погоди и да ја одведе Португалија во полуфиналето.

 

Противник на Португалија во полуфиналето ќе биде подобриот од натпреварот меѓу дебитантот Велс и фаворизираната селекција на Белгија, кој ќе се игра вечерва од 21 часот во Лил.

 

Втората полуфинална двојка ќе ја дадат победниците од преостанатите два четвртфинални дуели кои ќе се играат в сабота и недела, исто така од 21 часот, а во кој актуелниот светски шампион Германија за противник ќе го има европскиот вицепрвак Италија, додека домаќинот Франција ќе игра против најпријатното изненадување на првенството досега, селекцијата на Исланд.