Габриел: Ваква Турција никогаш нема да стане членка на ЕУ

Турција никогаш нема да стане членка на ЕУ се додека со неа управува Реџеп Тајип Ердоган, изјави германскиот министер за надворешни работи Зигмар Габриел, обвинувајќи го турскиот претседател дека не ги сфаќа сериозно пристапните преговори со Унијата.

- Јасно е дека во оваа состојба Турција никогаш нема да стане членка на ЕУ. Не затоа што ние не сакаме, туку затоа што турската Влада и Ердоган брзо се оддалечуваат од се кон што се стреми Европа, истакна Габриел во интервју за германскиот весник „Билд“.

Тој смета дека „земја која ја ограничува слободата на говорот, затвора невини луѓе и ја потиснува опозицијата, не може да стане дел од ЕУ“.

На прашањето дали би им препорачал на германските државјани да патуваат во Турција, тој одговорил дека „тоа сега не може да се направи со мирна совест“.

- Ние немаме проблем со земјата, ниту со Турците, туку имаме проблем со актуелната власт и политиката која ја спроведува претседателот, нагласи шефот на германската дипломатија, додавајќи дека „Турција е голема и ќе постои и по Ердоган“.

Германско-турските односи се заострија по апсењето на двајца германски новинари и активисти во Турција, а дополнително се влошени откако Ердоган ги повика Турците во Германија да ги бојкотираат партиите на владејачката коалиција на изборите следниот месец.