Грција нема да ја постигне целта за примарен суфицит како што бараат кредиторите

Грчкиот премиер Алексис Ципрас изјави дека Грција нема да биде во можност да ја постигне целта за примарен суфицит во буџетот кога ќе заврши тековната програма за помош која истекува во 2018 година, пишува „Вол Стрит Џурнал“.

- Ние гарантираме дека ќе постигнеме 3,5 отсто примарен суфицит, дури и ако мора да ја искористиме фискалната сопирачка, но само еднаш во 2018 година, рекол Ципрас на брифингот со новинарите во авионот додека патувал од Кина во Атина на крајот од неговата петдневна официјална посета на Пекинг.

Согласно третата програма за спас на Грција, земјата треба да го зголеми својот примарен суфицит на 3,5 проценти од БДП до 2018 година и да го задржи на тоа ниво. Грција донесе закон за фискален механизам за автоматско намалување на државната потрошувачка ако земјата не ги исполни своите фискални цели. За Ципрас оваа цел е „шега“ и „бајка“.

Меѓународниот монетарен фонд смета дека Грција нема да биде во можност да постигне вишок од повеќе од 1,5 отсто во текот на следните години. Во мај, министрите за финансии од еврозоната и ММФ постигнаа договор кој го отвори патот за нови кредити.