Груевски се сретна со Роберт де Грот

Претседателот на ВМРО-ДПМНЕ Никола Груевски денеска се сретна со државниот директор за европска соработка во Министерството за надворешни работи на Холандија, Роберт де Грот.

Соговорниците, како што соопштија од партијата, разговарале за актуелните случувања поврзани со политичката криза, предизвиците со кои се соочува државата, како и остварувањето на стратешките цели и интереси на Република Македонија.

Груевски истакнал дека целта на ВМРО-ДПМНЕ е брзо надминување на политичката криза, и враќање на процесите во нормала, обезбедувајќи сигурност и стабилност потребна на граѓаните.

Посочил и дека при носењето на одлуките партијата се води од интересите на државата, запазувајќи ја, како што потенцирал,  волјата на граѓаните. ВМРО-ДПМНЕ, истакнал тој, е отворена за постигнување на решенија кои би значеле додадена вредност на процесите важни за државата.

Соговорниците разговарале и за евроатланските интеграции на државата при што Груевски посочил дека влезот во ЕУ и НАТО преставува стратешка цел за што и се превземаат активностите и мерките предвидени со акцискиот план, а кои се во насока на унапредување на критериумите во повеќе суштински области од судството, администрацијата, медиумските слободи.