Грушко: Влезот на Црна Гора во НАТО ќе ги продлабочи линиите на поделба во Европа

Влезот на Црна Гора во НАТО дополнително ќе ги продлабочи линиите на поделба во Европа, изјави постојаниот претставник на Русија во Северноатлантската алијанса Александар Грушко, јави ТАСС.

- Тоа не е прво проширување на Алијансата, и се разбира ниту еден круг од проширувањето не ги подобрил нашите заемни односи со земјите кои одлучиле да влезат во НАТО, рече Грушко.

Во четвртокот шефовите на дипломатиите на НАТО потпишаа Протокол за присоединување на Црна Гора кон Алијансата. За да стапи во сила, документот треба да биде ратификуван од сите држави од НАТО.

Според Грушко, проширувањето на НАТО „создава нови или ги преместува старите линии на поделба во Европа и противречи на самата потребност за создавање нов систем за колективна безбедност на континентот, кој има потреба од обединети напори во борбата против новите закани и ризици“.

Тој истакна дека преку забрзаната процедура за прием, која Алијансата ја наложила кон Црна Гора, НАТО ги нарушил сопствените критериуми во однос на кандидатите за членство.