И Турција го нормализираше визниот режим со САД

Турската Амбасада во Вашингтон денеска соопшти дека ги укинува ограничувањата за издавање визи за американски државјани, откако и САД презедоа ист чекор.

Двете земји го ограничија издавањето на визи во октомври, кога турските власти уапсија вработен во американскиот конзулат во Истанбул, под сомнеж дека е дел од организацијата на исламскиот проповедник Фетулах Ѓулен.

- Согласно принципот на реципроцитет, ограничувањата во визниот режим се укинати во исто време со укинувањето на американските ограничувања, соопшти турската Амбасада во САД.

Дополнително, турската Амбасада информира дека Турција не им дала на САД никакви гаранции дека нема да бидат гонети вработени во американските дипломатски претставништва кои се вмешани во минатогодишниот обид за државен удар.

Во соопштението на американската Амбасада во Турција беше наведено дека турските власти дале ветување оти нема да има нови обвиненија против американски дипломати или турски државјани кои работат во американските дипломатски претставништва, а доколку има, Турција на време ќе ги информира американските претставници.

Турција бара од САД екстрадиција на Фетула Ѓулен, кој со децении живее во американската сојузна држава Пенсилванија, од каде раководи со својата глобална мрежа на компании и училишта. Одбивањето на САД да го екстрадираат Ѓулен ги влоши односите меѓу двете земји.