Индија со вештачки дожд ќе се обиде да го реши загадувањето на воздухот

Во главниот град на Индија, Њу Делхи првпат е предизвикан вештачки дожд во обид да се ублажи големото загадување на воздухот.

Регионалната Влада на Њу Делхи во соработка со Индискиот технолошки институт во Канпур вчера извршија експеримент за вештачко предизвикување на дожд. Едномоторен авион Цесна истрела ракета со хемикалии наменети за распрснување на облаци и поттикнување на дожд.

Целта на проектот е со вештачки предизвикан дожд да се намали концентрацијата на штетни честички во воздухот, кои во зимските месеци достигнуваат опасни нивоа по здравјето на луѓето.

Владата планира, доколку тестот се покаже како успешен, да спроведе поширока кампања за вештачко предизвикување дожд во текот на наредните недели за привремено подобрување на квалитетот на воздухот и намалување на ризиците по здравјето на жителите.