Институт за проучување на војна: Русија не е подготвена на никакви значајни отстапки во врска со Украина

Русија не покажува „никакви знаци дека е подготвена на значајни отстапки во врска со Украина“, објави денеска американскиот Институт за проучување на војната (ISW).

Овој тинк-тенк истакнува дека, иако руски и американски претставници се сретнаа во Саудиска Арабија за да разговараат за војната во Украина, целите на рускиот претседател Владимир Путин остануваат непроменети.

Според извештајот на Ен-Би-Си, на кој се повикува ISW, западните разузнавачки служби и американски конгресни претставници тврдат дека Путин сè уште има за цел целосна контрола врз Украина и дека неговите амбиции се „максималистички“.

„Шест извори потврдија дека Путин би можел да прифати примирје или мировен договор само за да ѝ овозможи на руската армија да се прегрупира и обнови.

Постојат индиции дека тој би влегол во преговори само за да види какви отстапки може да добие и да се реинтегрира во меѓународната заедница“, се вели во анализата.

Дополнително, двајца конгресни претставници и поранешен висок функционер на американската администрација нагласуваат дека „широките амбиции“ на Путин останале непроменети од времето на администрацијата на Бајден.

Според ISW, ниту една разузнавачка проценка не покажува дека Путин ја сменил својата стратегија за победа во Украина, а официјални изјави од Москва укажуваат дека Кремљ нема намера да преговара со искрени намери.