Иран и Саудиска Арабија ги затоплуваат односите

 Иранските власти изразија задоволство од промената на тонот на Саудиска Арабија откако саудискиот престолонаследник принцот Мохамед бин Салман изјави дека Ријад сака добри односи со Техеран.

Иран и Саудиска Арабија ги прекинаа дипломатските односи во 2016 година и со години заемно се обвинуваат за дестабилизација на Блискиот исток. Покрај тоа, Саудиска Арабија е сојузник на САД, кои Исламската Република ги смета за свој непријател.

Сепак, Мохамед бин Салман во вторникот рече дека Иран е соседна земја и оти единствено што Саудиска Арабија сака е да има добри и посебни односи со Иран. Овие зборови на саудискиот принц означуваат промена на неговиот тон. Досега, Мохамед бин Салман редовно го обвинуваше Техеран дека ја подгрева регионалната нестабилност.

– Иран беше првиот кој тргна на патот на регионалната соработка и ја поздравува промената на тонот на Саудиска Арабија. Со усвојување на конструктивни ставови засновани на дијалог, овие две важни земји во регионот и исламскиот свет можат да ги надминат разликите и да отворат нова страница соработка за мир, стабилност и развој во регионот, изјави Саид Хатибзаде, портпарол на иранското Министерство за надворешни работи.