Калас: Путин се потсмева на мировните напори за Украина

Високата претставничка за надворешна политика и безбедност на Европската Унија, Кaja Калас, остро ги осуди масовните руски воздушни напади врз Киев, во кои загинаа повеќе од десет лица, меѓу кои и деца. Таа денеска порача дека Москва мора да се соочи со нов бран санкции.

– Овие напади покажуваат дека Путин се потсмева на сите мировни напори кои се прават, рече Калас по пристигнувањето на дводневниот состанок на министрите за одбрана и надворешни работи на ЕУ во Копенхаген.

Според неа, новите санкции против руските енергетски извози и финансиски услуги „ќе имаат најсилен ефект“.

Покрај тоа, Калас ги повика земјите-членки на Унијата да продолжат со снабдување на Киев со оружје. – На Украина во овој момент и е потребна целата можна воена поддршка, потенцира таа.

Министрите во Копенхаген ќе дискутираат и за безбедносни гаранции за Украина по завршувањето на војната. Како можни мерки се споменуваат продолжување на обуката за украинската армија и поддршка на тамошната одбранбена индустрија.

– Но, ако гледаме што прави Путин, денот по војната сè уште не е близу, призна Калас.

МИА