Концерт на „Чалгија саунд систем“ во Прилеп

Групата „Чалгија саунд систем“ вечер ќе одржи целовечерен концерт на плоштадот „Александрија“ во Прилеп, во рамки на Прилепско културно лето кое го организира Центарот за култура „Марко Цепенков“.

„Чалгија саунд систем“ е основана во 2008 година со цел да го одржи чалгискиот израз, проучувајќи го богатото наследство од мелодии и форми, кои составот ги изведува доследно и верно на традицијата. Тие го земаат чалгискиот израз како основа за создавање современа музика која е во духот на чалгиската традиција. 

Досега имаат реализирано повеќе настапи на фестивали, како што се самостојните целовечерни концерти на 1.st International Istanbul Music and Dance Encounter и на Оффест 2015, настапувале и на Скопско лето, „Мариово оф роуд“, „Локум фест“, Етно фестивал во Битола...  Групата многу често настапува  во живо насекаде низ Македонија и го подготвува вториот албум.