Конференција за миграциите во транзитните земји и безбедносните импликации

Меѓународна конференција на тема „Миграции и прилив на бегалци во транзитните земји: безбедносни импликации“, ќе се одржи денеска во организација на Институтот за геостратешки истражувања и надворешна политика (ИГИНП) при Министерството за надворешни работи на Република Македонија. 

Конференцијата, како што соопшти МНР, е организирана во рамки на македонското претседавање со Централноевропската иницијатива (ЦЕИ) за 2015 година.

На конференцијата ќе учествуваат високи претставници од сите значајни меѓународни институции, како што се: ОН, ОБСЕ, ЦЕИ, ИОМ, МАРРИ, како и од над 50-ина други претставници од странство.

Како што е најавено, на конференцијата ќе се обратат заменик-министерот за надворешни работи Драгана Кипријановска, директорот на ИГИНП, амбасадорот Абдулкадар Мемеди, алтернативниот генерален секретар на Централноевропската иницијатива, Марго Клестил-Лофер, министерот за внатрешни работи на Македонија Оливер Спасовски и министерот за безбедност на Босна и Херцеговина, Драган Мектиќ.

Покрај одржување на два панели на различни теми за проблемот со миграциите, на конференцијата ќе се потпише и меморандум за соработка помеѓу ЦЕИ и МАРРИ Центарот.