Костадиновски: Бадентерот е корисен и здрав механизам, но само во политички орган, секаде на друго место создава аномалии

Бадентерот е многу корисен и здрав механизам за држава и општество како што е нашето, но само во политички орган како Собранието и секаде на друго место каде што ќе биде предвиден создава аномалии, смета претседателот на Уставниот суд, Дарко Костадиновски и нагласува дека ако тоа се случи во орган како Уставниот суд „граѓаните во истиот момент може да заборават на правната држава и слободно да стават клуч и да ја затворат оваа институција“. 

Костадиновски, одговарајќи на новинарски прашања за заложбите на ДУИ за Бадентер во Уставен суд, на денешната годишна прес-конференција, рече дека Уставниот суд не смее да се сведе во ситуација „не правни и уставни аргументи, туку етнички да бидат пресудни“. 

-Во орган како Уставниот суд, што е контролор на Собранието кое треба да носи закони, вклучително и со Бадентерово мнозинство, да се сведе во ситуација не правни и уставни аргументи, туку етнички да бидат пресудни, нема потреба од постоење на таква институција. Подобро е клуч, државата ќе заштеди, не знам колку е нашиот буџет, меѓутоа граѓаните може да заборават на правна држават. Истото го мислам и за други органи, како Бадентер во Судски совет, кој не е политички орган. Тоа е мој личен став, изјави Костадиновски.  

Во однос на тоа дека „во судот често се гласа етнички“, Костадиновски вели дека тоа повеќе зборува за судиите и дека во моментот кога судијата ќе ја облече тогата, нема разлики, ниту етнички, ниту социјални, верски или општествени. 

-Замислете како судии ако ги внесеме во судница нашите разлики, по било кој основ, и ако тоа се пресудни аргументи за одлучување, тогаш ние не сме судии. Ние имаме една и единствена должност, и таа заклетва ја даваме во Собранието, дека ќе го штитиме и чуваме Уставот, и притоа посегнуваме само по уставно правни аргуменит. Толку, нагласи Костадиновски. 

МИА