Лидерот на Мост ќе биде еден од вице-премиерите во хрватската Влада

Лидерот на партијата Мост, Божо Петров ќе биде еден од вице-премиерите во новата хрватска влада на Тихомир Орешковиќ, изјави денеска пратеникот од редовите на Мост, Јуро Мартиновиќ при гостување во емисија на Хрватското радио.

- Членовите на владата ќе се избираат во договор меѓу Мост, Татковинската коалиција и премиерот, при што во прв план ќе биде стручноста на секој кандидат, додаде Мартиновиќ.  

Во истата радио емисија гостуваше и лидерот на Хрватската селанска партија (ХСС), Бранко Хрг, кој најави дека до 11 јануари ќе биде подготвен закон за намалување на бројот на министерствата во хрватската влада.

- Јапонија има шест министри, а ние имаме 20. Планираме да го намалиме бројот на министри за најамалку пет и да укинеме голем број агенции. Ние ќе предложиме кандадати за министри, но премиерот ќе ги избере, додаде Хрг, чија партија е членка на Татковинската коалиција.

Хрг најави и дека согласно договорот со Мост, Татковинската коалиција ќе го предложи кандидатот за претседател на Хрватскиот сабор, но не соопшти конкретно име за оваа функција. 

Хрватската претседателка Колинда Грабар-Китаровиќ вечерва на познатиот бизнисмен Тихомир Орешковиќ му го врачи мандатот за формирање нова влада на Хрватска, на предлог на Татковинската коалиција и партијата Мост. 

Орешковиќ, кој не е член на ниту една партија, има рок од 45 дена да ја формира неговата влада.

Лидерите на Мост и Татковинската коалиција, Божо Петров и Томислав Карамарко во вторникот најавија дека очекуваат новата влада да биде фомирана најдоцна за еден месец.