Манифестација „Краиште 2016“ во месноста Голеш

 Жителите на пограничните општини Ќустендил, Босилеград и Крива Паланка денеска се сретнаа во месноста Голеш, на тромеѓето меѓу Република Македонија, Република Бугарија и Република Србија на манифестацијата „Краиште“ 2016.

Традиционална трилатерална средба се организира од страна на локалните самоуправи на трите општини, а по повод православниот празник Петровден. На средбата присуствуваа градоначалниците на Крива Паланка, Арсенчо Алексовски, на Босилеград, Владимир Захариев и претставник од општина Ќустендил.

- Овие средби се одлична можност за дружење меѓу нас соработниците од општините од пограничниот крај, но пред се на граѓаните и месното население од оваа област каде е долга традицијата на вакви среќавања на кои се зближуваат народите од трите страни на граничните линии. Ова денес им е особено лесно бидејќи 8 до 20 часот времениот премин е отворен за сите граѓани и може да се минува само со лична карта или патна исправа, рече по средбата Алексовски.

Додаде дека вој голем празничен народен собир е можност за дружење со пријателите од Србија и Бугарија, а граѓаните кои доаѓаат и од разни краеви на овие земји се среќаваат и со роднините и пријателите.

Настанот беше збогатен со културно-уметничка програма со настапи на фолклорни друштва и ансамбли од трите општини.