Меркел до Ердоган: Германија е против враќањето на смртната казна во Турција

Германскиот канцелар Ангела Меркел му порача денеска на турскиот претседател Реџеп Таип Ердоган дека Германија силно се противи на враќањето на смртната казна во Турција, како и дека таквиот чекор ќе му попречи на членството на Турција во ЕУ, изјави портпаролката на германската Влада.

Таа појасни дека Меркел во телефонски разговор го повикала Ердоган да остане лојален на принципите на пропорционалност и на владеењето на правото во одговорот на турската држава кон учесниците во обидот за воен удар.

Портпаролката додаде дека последниот бран апсења и разрешувања во Турција е причина за голема загриженост.