Мицкоски: Исправена е неправдата, доделени национални признанија за врвни достигнувања во спортот

Премиерот Христијан Мицкоски денеска одржа инспиративен говор на свеченоста на која беа доделени национални признанија за врвни спортски достигнувања, упатувајќи силна порака за вредноста на трудот, истрајноста и љубовта кон татковината.

„Денес не зборуваме само за спорт. Зборуваме за пожртвуваност, за истрајност, за достоинство и за љубов кон татковината“, рече премиерот, нагласувајќи дека доделувањето на признанија е повеќе од формалност – тоа е длабока, искрена и заслужена почит за животен подвиг.

Мицкоски истакна дека овие признанија се чин на враќање на долг на оние кои ги претворија своите соништа во резултати, а резултатите – во национална гордост. „Тоа се луѓе кои не барале ништо, а дадоа сè“, порача тој.

Премиерот најави дека ова е почеток на нова политика и систем на вредности, во кој спортот не е само натпревар, туку образец за животот. Признанијата се доживотни и, како што рече, претставуваат конкретен израз на благодарност, а не само симболика.

„Овие 22 признанија се само почеток. Почеток на една нова политика во која успехот нема да се заборава, а вложениот труд ќе се вреднува со почит. Државата која не ги цени своите херои, полека ја губи својата душа“, истакна Мицкоски.

На крајот, тој им порача на младите спортисти дека Македонија ќе биде тука за нив: „Ќе ве препознае, ќе ве поддржи и, во рамките на своите можности, ќе ви се оддолжи – како што денес им се оддолжуваме на оние кои веќе го испишаа своето име со златни букви.“

Свеченоста заврши со пораката дека државата ќе продолжи да вложува во спортот и во систем што ќе го вреднува секој успех.