Митрополит г. Петар: Господ да стави рака и да прекрати секаква рана, секаква болка и тага

Во Преспанско-пелагониската православна епархија, утрово во сите храмови на епархијата, на празникот Младенци, се богослужат заупокоени свети литургии за упокоените и вечно живи пред Христа Господа, а за оние кои се лекуваат, се богослужи молебен за нивно побрзо закрепување и оздравување.

- Господ да стави рака и да прекрати секаква рана, секаква болка и тага, Бог да ги прости упокоените од трагедијата во Кочани и да им подари рајска населба, а на болните здравје, закрепнување и оздравување, порача митрополитот преспанско-пелагониски и администратор австралиско-новозеландски г. Петар.

Тој посочи дека нашата татковина Македонија и Македонската православна црква изгубија дел од својата иднина, како што рече, изгуби млади садници и фиданки, што требаше допрва да се разгрануваат. - Од нашата автокефална Македонска црква и нашата самостојна и суверена татковина Македонија глас се слуша, ридање и пискот голем, зашто плачеме над своите чеда и не можеме да се утешиме зашто ги нема. Со нашите молитви да испливаме и да ги надминеме сите овие искушенија и темнини што се надвиснале над нас, а на оние што се борат за живот и се лекуваат во болниците на нашата држава и во болниците ширум светот, Господ Лекарот над лекарите, да ги исцели и да ги подигне од нивните болеснички постели, истакна митрополитот г. Петар.

Празникот Младенци кој секоја година масовно се одбележува во битолскиот манастир посветен на Светите четириесет Битолски и севастополски преподобни маченици, но синоќа традицијата кај месноста Кркардаш мина низ молк со палење свеќи во манастирскиот комплекс над Битола.