Могерини: Европа има потреба од мигрантите

Европа има потреба од мигрантите за својата економија, изјави денеска во Валета високата претставничка на Европска комисија за надворешна политика и безбедност Федерика Могерини.

Таа додаде дека населението на ЕУ старее и оти земјите-членки имаат потреба од работна сила.

- Проблемот со миграциската криза може да биде решен само по пат на соработка, без изградба на ѕидови, истакна Могерини на почетокот на средбата Европа - Африка, посветена на миграциската криза, што се одржува на Малта, која претседава со ЕУ.

Могерини истакна и дека африканските држави треба да имаат во предвид дека трпат загуби од илегалната трговија со луѓе.

Таа во текот на денот ќе присуствува на церемонијата во Валета на врачувањето на дипломи на 89 претставници на либиската крајбрежна стража, обучени од европската воена морнарица за борба против криумчаррите на мигранти во Средоземно Море.