Могерини со критика кон политиките што ја изолираат Куба

Високата претставничка на ЕУ за надворешна политика и безбедност Федерика Могерини упати критика кон политиките кои ја изолираат Куба.

- Има луѓе кои се обидуваат да ја изолираат Куба. Ние Европејците, напротив, сакаме да покажеме дека сме поблиски до вас од кога и да било, изјави Могерини на една академска конференција во Хавана.

Според кубанските аналитичари, ваквата изјава на Могерини се однесувала на американскиот претседател Доналд Трамп.

- Соочувајќи се со оние што градат ѕидови и затвораат врати, ние Европејците сакаме да градиме мостови и да ги отвориме вратите преку соработка и дијалог, додаде таа.

Ова е прва посета на Могерини на Куба, откако во ноември влезе во сила договорот за политички дијалог и соработка меѓу ЕУ и Куба. Тоа ќе биде нова правна рамка за билатералните односи, вклучително и политичкиот дијалог, соработката и заеднички акции во меѓународните форуми.