Над 100.000 мигранти во 2017. пристигнаа во Европа преку Медитеранот

Од почетокот на годината над 100.000 мигранти и бегалци пристигнаа во европските земји преку Средоземно Море, соопшти денеска Меѓународната организација за миграции (ИОМ).

Како што јави ТАСС, во обид да го минат овој пат загинале или исчезнале над 2.200 лица.

Според статистичките податоци на ИОМ, од почетокот на 2017 година во Европа пристигнале 101.210 мигранти и бегалци. Над 85 000 од нив се насочиле кон Италија, вклучувајќи ги и оние над 12.000 кои минатата недела пристигнаа во земјата.

Од 1 јануари Грција примила над 9.000 лица, а Шпанија над 6.000.

Од почетокот на годината 2.247 мигранти и бегалци загинале во обидот по морски пат да дојдат до европските земји.