Неисправна водата за пиење во винички Градец и Трстија

Неисправна е водата за пиење во селата Градец и Трстија во општина Виница, покажале анализите на Јавното комунално претпријатие „Солидарност“.

- Во населените места Градец и Трстија  квалитетот на водата не  е на задоволително ниво. Анализите покажаа присутво на одредени бактери. Правиме напор со добиените резултати и мерките кои ни се дадени, да ја санираме состојбата и водата да биде исправна за пиење. Во текот на годината се јавуваат  периоди  кога водата е неисправна  за пиење од селските водови како последица  на поплави или врнежи, изјави Игор Спасовски, директор на ЈКП „Солидарност“ Виница.

Со набавката на хлоринатори за автоматско хлорирање на водата и сончевите панели за обезбедување електрична енергија,  посочи Спасовски, квалитет на водата за пиење е подобрен, но за нејзина стопроцентна исправност треба да се изгради филтер станица за двете населени места.

- Општина Виница во изминатиов период инвестира во изградба на филтер станица  во село Крушево. Анализите покажуваат дека сега таму  водата е на добро ниво, истакна Спасовски.

Во наредниот период водоводот во село Крушево ќе биде преземен за стопанисување од страна на ЈКП Солидарност и останува уште изградбата на филтер станица во село Трсино за која што се одобрени пари, се очекува да се распише тендер и да се избере понудувач за изградбата. Со тоа, укажа Спасовски, ќе се реши проблемот кој постојано се јавува со  квалитетот на водата во село Трсино.