Објавени детали за гаснењето на пожарот во „Глобал“

Пожарникарската единица од Струмица на Фејсбук ги објави деталите за гаснењето на пожарот во Трговскиот центар „Глобал“.

Велат дека температурата се мерела со стотици степени, видливоста била еднаква нанула, а двајца пожарникари добиле нагони на повраќање веднаш штом влегле во објектот.

-Пожарот во внатрешноста беснее со огромни размери, температурата се мери во стотици степени, видливоста е еднаква на нула, кислород во внатрешноста еднаков на нула. Секое вдишување на чад повеќе од 15 секунди предизвикува несвестица и подоцна смрт. Двајца пожарникари спасители кои во тој момент влегуваат во ГТЦ Глобал почнуваат да чувствуваат слабост и нагон за повраќање. Од страна на екипи на брза помош им се укажува помош при што едниот од нив се препраќа кон болницата во Струмица и прима инфузија , додека другиот по негово барање се враќа на должност. Во првите 30 минути од пожарот целата единица од Струмица веќе дејствува од сите три влезови. Успешно се спречува ширењето на пожарот кон вториот кат од надворешната страна со поставување на скали. Од влезот од ул.Васил Сурчев и ул.Ленинова екипи на пожарникари спасители со специјални изолациони апарати за дишење влегуваат внатре во ГТЦ Глобал и успеваат да го спречат ширењето на пожарот кон јужната страна, кон бул. Маршал Тито.  Екипа од пожарникари влегува во ГТЦ Глобал од кај гаражите барајки ги хидрантите и се утврдува дека тие се неупотребливи, поради што сите ПП возила мораат да ротираат кон базата за полнење вода и се губи драгоцено време и енергија, велат од ТППЕ Струмица.

Во гаснењето се приклучија и нивните колеги од Радовиш, Валандово, Кавадарци и Штип.