Објавени фотографии од остатоци од египетскиот авион

Портпаролот на египетската војска објави денеска на официјалниот профил на Фејсбук фотографии од пронајдените предмети и делови од урнатиот авон на компанијата „ИџиптЕр“. 

На фотографиите се гледаат делови, седишта и други објекти со сино-бела боја на египетската авиокомпанија, како и жолт елек за спасување.

Египет претходно соопшти дека се пронајдени делови од авионот, личен багаж и делови од човечки тела во Медитеранот околу 290 километри северно од Александрија. 

Авиони и бродови од Египет и уште пет земји ја продолжија денеска потрагата во пошироко подрачје на Средоземното Море за да ги пронајдат остатоците од авионот, кој се урна со 66 патници и членови на екипажот. 

Тимовите трагаат по остатоците од авионот „Ербас А320“, меѓу кои и црната кутија.