Османи: Семејството Скаик од Газа вратени во земјава, работиме на извлекување на уште двајца наши државјани

Министерот за надворешни работи, Бујар Османи преку објава на својот Фејсбук профил информира дека четиричленото семејство Скаик по подолго време е безбедно евакуирано од Газа и тие денеска се вратија во земјава. Османи посочува дека сите напори сега се фокусирани на извлекување на уште двајца наши државјани, брачен пар, чија евакуација, како што вели, ја очекуваат наскоро.

-Семејството Скаик, после подолго време безбедно евакуирани од Газа, а од денес на сигурно во земјава. Евакуацијата од Газа претставува посебен дипломатски и пред сѐ конзуларен предизвик, имајќи ја предвид сложената безбедносна состојба во тој регион. Посебно сакам да оддадам признание на дипломатите во нашите амбасади во Каиро и Тел Авив, кои беа во постојан контакт и со семејството и со властите во Египет и Израел, напиша Османи.

Упати благодарност до Меѓународната организација за миграции (IOM) која помогнала при нивниот трансфер во Скопје, како и Министерството за труд и социјална политика, односно Центарот за социјална работа во Скопје, за организацијата на сместувањето.