Почна вонредната седница на Генералното собрание на ОН за Ерусалим

Во Њујорк почна вонредната седница на Генералното собрание на ОН, посветена на американската одлука да го признае Ерусалим за главен град на Израел, која се одржува по барање на некои арапски земји и држави со главно муслиманско население.

На седницата повторно ќе се гласа за предлог-резолуцијата на ОН за повлекување на одлуката на претседателот на САД, Доналд Трамп.

САД во понеделникот ставија вето на таквата резолуција, а денешното гласање нема да биде обврзувачко, но сепак ќе има политичка тежина.

Амбасадорката на САД во ОН, Ники Хејли изјави дека добила наредба од Трамп да следи кои држави ќе гласаат против САД, предупредувајќи дека ќе „ги запишува имињата“.

Трамп вчера истакна дека САД ќе ја укинат финансиската помош за земјите кои гласале за резолуцијата на ОН.