Повик за невработени кои ќе пружаат грижа за стари лица од Кривопаланечко

Старите и изнемоштени лица од руралните средини во Крива Паланка ќе добиваат основни медицински услуги и нега во рамки на проектот „Општинско корисна работа“ кој ќе го имплементира локалната самоуправа на општината.

Проектот е финансисран со средтсва од Програмата за развој на Обединетите Нации (УНДП) и од буџетот на општината.

-Во овој проект се вклучени и Министерството за труд и социјална политика, Агенцијата за вработување и општинскиот Црвен крст. Во моментот во тек е оглас за ангажирање медицински лица, фармацевти, негуватели и социјални работници кои ќе ги пружаат услугите од проектот, посета на 80 стари и изнемоштени лица од општината и грижа за нив во однос на психо-физичката, здравствена состојба, изјави градоначалникот на Крива Паланка, Арсенчо Алексовски.

Паралелно, истакна, во тек е и повик до сите заинтересирани потенцијални корисници.

- Сите кои имаат потреба од вакви услуги ги охрабрувам да се пријават, по што комисија од општината, АВРМ и МТСП ќе ги селектира крајните корисници на проектот. Предвидено е услугите да ги пружаат тимови од две лица кои ќе посетуваат одреден реон од селата во околината на градот. На корисниците ќе им бидат измерени шеќер во крв, притисок и ќе им бидат завршени основни потреби во домот, додаде Алексовски.

Според него најважен е социјалниот момент со кој овие лица нема да се чувствуваат отфрлени, осамени и заборавени.

-Упатувам повик до сите евидентирани невработени лица да се пријават на огласот кој е во тек, во АВРМ. Лицата кои ќе бидат ангажирани ќе добиваат месечен надомест од 6400 денари нето, нагласи Алексовски.

Проектот ќе започне да се имплементира од 1 септември 2016, а предвидено е да трае до 17 март следната година.