Повреден 12-годишен велосипедист во Тетово, возачот побегнал

Дете на возраст од 12 години денеска е удрено од автомобил додека се возело со велосипед улицата Љуботенска во Тетово.

Возачот откако со возилото го удрил и соборил малиот велосипедист од Мала речица, наместо да застане и да му укаже помош на повреденото дете, веднаш побегнал од местото на сообраќајката.

Детето кое се здобило со телесни повреди е префрлено во тетовската клиничка болница каде му е укажана прва помош, а потоа бил пуштен дома.

Полицијата трага по несовесниот возаќ.

Од СВР Тетово информираат дека годинава во сообраќајки во Тетово вкупно биле повредени 52 пешаци од кои 15 се здобиле со потешки телесни повреди, а 37 поминале со полесни повреди.

Во последните 9 месеци имало и 38 повредени велосипедисти и мотоциклисти од кои петмина се здобиле со тешки телесни повреди.