Преку 1.000 маски на „Батко Ѓорѓија“ во Куманово

Повеќе од 1.000 маски продефилираа на 13. маскенбал „Батко Ѓорѓија“ што се одржа денеска на градскиот плоштад во Куманово.

Манифестацијата ја организираа Општината и Фондацијата за развој на кулутрата и спортот од Куманово. Учествуваа ученици од шест објекти на градинката „Ангел Шајче“, од 16 основни и пет средни училишта во градот кои се претставија со групни и индивидуални маски, како и гости од Струмичкиот карневал кои настапија во ревијалниот дел.

- На наше големо задоволство традицијата продолжува и кумановскиот маскенбал „Батко Ѓорѓија“ се случува од 2002 година, првично во организација на Коледарското здружение, а подоцна го презема Општината под покровителство на градоначалникот Зоран Дамјановски, со голема поддршка од Советот. Има прекрасни маски и тоа ни дава голема инспирација и повод ова да прерасне во карневал кој би имал и поголемо и меѓународно значење, изјави претседател на Фондацијата за култура и спорт при Општина Куманово Нино Величковски.

Тричлена жири комисија додели награди за најдобрите учесници на ниво на градинки, основни и средни училишта, но и во поединечна конкуренција. 

Според организаторите, интенциите се манифестацијата да прерасне во карневал кој ќе влезе и во Меѓунаредоната фестивалска програма со цел да се етаблира и во Македонија и надвор од државата.