Презентирана Стратегијата за младите во општина Штип

Советот на млади на општина Штип денеска пред претставници од локалната самоуправа и градоначалникот Благој Бочварски ја презентираа Стратегијата за млади за период од 2018-2022 година.

Сања Стефанова, претседател на Советот на млади на општина Штип, истакна дека анкетата која ја реализирале меѓу младите и невладините организации покажала дека младите сакаат изградба на нови спортски сали, Студентски дом, кино сала и затворен базен.

- Главен приоритет сепак на младите во Штип е нивното вработување, со што ќе се намали одливот на младите кадри во странство. Стратегијата опфаќа проектни активности во кои младите активно ќе се вклучат во демократското живеење, рече Стефанова.

Стратегијата за млади општина Штип во целост ќе ја поддржи, како со поддршка на проектните активности, така и со директно вклучување на младите во реализација на активностите. Претседателот на Советот на општина Штип, Јане Миланов истакна дека ќе се заложи Стратегијата за млади во целост да биде имплементирана од страна на локалната и централната власт.