Промовирани флаери за пет планинарски патеки на Осоговските Планини

Планинарско-спорскиот клуб „Руен“ од Крива Паланкa промовираше брошури за пет атрактивни планинарски патеки во реонот на Осоговските Планини, кои се потенцијални тракинг-рути за развој и промоција на планинскиот туризам во регионот.

Промотивните флаери се изготвени како финален продукт од активностите на проектот ,,Планинарски патеки’’ кој ПСК ,,Руен’’ го имплементираше изминатите месеци.

-Овие флаери ги изготвија нашите членови, вклучени се патеките од Крива Паланка до Царев Врв, 2085 метри надморска височина, до Руен-преку Тораница, 2252 метри, Расовец – со највисок врв 1100 метри, Рударската патека насловена „По корка леб во својата земја“, која е долга 25 километри од Мождивњак до рудници Добрево и Станечки водопади – почнувајќи од мостот на Дурачка Река-до локалитетот Калин Камен, патека долга 11 километри.  Патеките се подготвени со мапи, сите се маркирани, има фотографии и толкување за нив и сите се подготвени за привлекување љубители на планината и природата, информира Катица Борисовска од ПСК „Руен “, Крива Паланка.

Покрај промотивните брошури за петте патеки, членовите на планинарско-спортскиот клуб реализираа теренски активности за фотографирање на објектите и патеките, исцртување на географски карти за секоја од патеките и нивен опис.

-Целта на проектот е развој на планинарството, планинарските спортови и планинарскиот туризам во подрачјето на Осоговските Планини, додаде Борисовска.

Проектот „Планинарски патеки’’ финасиски е поддржан и се реализира со средства од буџетот на општина Крива Паланка од Програмата за поддршка на здруженија на граѓани и фондации за 2018 година.