Проодни и чисти сите патишта во општина Новаци

Општина Новаци успешно се справува со интензивните врнежи на снег која ја зафатија територијата на општината.

Од општина Новаци информираат дека таму каде што општината е надлежна, чистењето на снегот од локалните патишта, улици и тротоари го извршува ЈКП „Комунална Хигиена“ –Новаци.

– Чисти се и се одржуваат и регионалните патишта. Целосно е исчистен патниот правец Битола –Новаци – РЕК Битола, во функција и со нормализиран сообраќај се и регионалните патни правци  Новаци – Добромири – Добрушево, регионалниот патен правец Битола – Новаци – Маково – Рапеш – Старавина, регионалниот пат Гермијан – Старавина – Витолишта, а вклучени се и селата Брод, Живојно, Бач и Добровени, истакна градоначалникот на општина Новаци, Љупчо Кузманоски.

Градоначалникот Кузманоски потврди дека на територијата на општина Новаци нема отсечени населени места.

-Досега немаме најава и  за некоја загрозеност по човечки живот, а доколку има тогаш во функција на општината е и Горско спасителното друштво „Ава Кота“, чија екипа е обучена за спасување во екстремни состојби. Сите надлежни органи будно ја следат состојбата и доколу има потреба ќе ангажираме и дополнителна механизација  со цел проодност и фунционалност на сите патишта во општина Новаци, нагласи Кузманоски.