Протести на Нов Зеланд против здравствените мерки

Конвој камиони и автоприколки денеска ги блокираа улиците околу Парламентот во Велингтон во знак на протест поради здравствените мерки воведени поради Ковид-19, по примерот на повеќедневната блокада во главниот град на Канада, Отава.

Вакциниран сум, но сум против да се принудуваат луѓето, изјави еден од демонстрантите.

На возилата може да се видат пораки како „Вратете ни ја слободата“ и „Принудата не е согласност“.

Протестот е мирен и полицијата соопшти дека нема апсења или поголеми инциденти.

Премиерката Џасинда Ардерн изјави дека нема намера да разговара со демонстрантите. Таа посочи дека мнозинството граѓани на Нов Зеланд ја поддржуваат владината програма за вакцинација.

– Дури 96 отсто од Новозеланѓаните се вакцинирани, што ни овозможува да живееме со помалку ограничувања денес благодарение на обезбедената заштита, истакна Ардерн.

На Нов Зеланд вакцинацијата против Ковид-19 е задолжителна за луѓето кои работат во сектори како што се здравството, полицијата, образованието и одбраната.

Конвој од камиони и автоприколки во Велингтон е организиран по примерот во Отава, која е парализирана од „Конвојот на слободата“ веќе 11 дена. Движењето, кое започна како отпор против задолжителната вакцинација на возачите на камиони кои ја минуваат границата, се претвори во митинг против здравствените мерки и премиерот Џастин Трудо.